Dongeng si Kabayan. Ieu carita pondok atanapi carpon basa Sunda. Nyarioskeun kaayaan si Kabayan nu hirup di zaman kiwari.

Caritana ngabahas kalakuan istrina si Kabayan. Mangga diaos caritana.

Dongeng Kunaon Pamajikan si Kabayan Jadi Bageur    

Kacaritakeun si Kabayan gaduh pamajikan nu namina nyi Iteung. Istri nu geulis, bahenol nerkom endah kabina-bina.

Ari dinu carita lain mah, nyi Iteung teh digambarkeun bageur, darehdeh sarta lungguh.

Tapi dina carita pondok ieu tibalik. Nyi Iteung teh nya galak, nya saeutik judes tur rada pikasebeleun.

Tapi kusabab si Kabayan bogoh, tetep weh manehna daek kawin jeung nyi Iteung.

Sore eta si Kabayan parantos rengse gawe di kantor. Manehna balik ka imah. Miharep nyi Iteung tos nyadiakeun kadaharan. Lapar cenah.

"Aeh si Akang, tos uih?" taros nyi Iteung waktos si Kabayan lebet ka bumina. Katinggal siga anu gumbira pisan rarayna ninggal caroge uih.

"Muhun Teung," waler si Kabayan kacida bungah. Sabab nyi Iteung mangsa eta meuni bageur.

"Bade ngaleueut naon, kopi atanapi teh manis tiis?" Nyi Iteung naros bari ngalaan kantong anu dibawa ku salakina. Teras nyimpen di tempatna.

"Teh manis tiis weh, akang halabhab kieu," waler si Kabayan bari ngalengkah kana korsi. Gek weh diuk.

Ilustrasi

Teu lila nyi Iteung tos beres ngadamel teh manis. Sor weh disimpen dina meja.

"Akang bade emam atanapi bade ibak heula?" Nyi Iteung naros bari mukakeun kaos kaki si Kabayan.

"Ibak heula sigana mah neng," jawab si Kabayan. Nya nyi Iteung ngoloyor ka dapur.

"Antosan sakedap urang ngadamel heula cipanas. Akang nonton tivi heula sabot ngantosan," saur nyi Iteung bari ngalengkah ka dapur.

"Nuhun atuh neng. Pamajikan akang anu panggeulisna sadunya," rayu si Kabayan bari nyetel tivi.

"Iteung tea," kadangu jawaban nyi Iteung ti pengker.

Teu kungsi lila nyi Iteung datang, "Akang, itu cai haneut atos siap di kamar mandi. Sok mangga geura ibak atuh, ieu andukna," saurna teh bari nunjuk ka cai sareng masrahkeun anduk.

Nya si kabayan ngoloyor ka tukang. Teu lila manehna beres. Terus asup ka kamar.

Nyampak nyi Iteung tos nyiapkeun baju ganti. Saatos beres salin, maranehna tuang sasarengan.

"Kieu ari gaduh pamajikan teh, karaos ni'mat," gerentes hate si kabayan.

Pas bade bobo si Kabayan nembe sadar. Yen aya nu salah tina sikep nyi Iteung teh.

Manehna mikir, naon sababna poe eta nyi Iteung bet bageur pisan. Biasana mah henteu kitu.

Asaan mah jarang dipangnyadiakeun cai panas, dipangmukakeun kaos kaki, sarta daek mawa kantong tur nyimpen di tempatna.

Dahar oge, kadang kudu meuli di warteg, keur haroream ceunah, jeuk pamajikana teh.

Si kabayan mikir lila, naon sababna bisa kitu. Pas ningali kalender, manehna karek sadar.

"Hadeeeeuuh... Pantesan bageur atuh pamajikan teh. Isukan gajihan!" Gerentes si Kabayan bari seuri koneng. "Boga pamajikan teh pikasebeleun, dasar Nini Lampir."

Katerangan

Nyi Iteung gaduh sabaraha hiji lalandihan ti si Kabayan. Diantarana nyaeta Nini Lampir sareng Tantri Kotak.

Kunaon bet dilandih Tantri Kotak? Mun hoyong terang, antosan caritana dilain waktos.

Dibaca oge: Dongeng Basa Sunda nu judulna Kunaon Maung Bet Belang

Bilih dina karangan ieu aya nu lepat, nyuhunkeun dihapunteun. Ngan ukur heuheureuyan atanapi lucu-lucuan hungkul tujuanna.

Cag, dugi kadieu wae Dongeng si Kabayan Jeung Pamajikan ieu. Mugia carita pondok ieu tiasa ngahibur nu maosna. Engke urang pendak deui.